Kumo.ai, стартапот за предиктивна вештачка интелигенција во кој ко-основач и извршен директор е македонецот Вања Јосифовски, ex-CTO на AirBNB и Pinterest, е купен од Nvidia. Порталот The Information објави дека вредноста на договорот е најмалку 400 милиони US долари, повикувајќи се на лице запознаено со трансакцијата. Fortune, пак, потврдува дека Kumo е преземен од Nvidia преку два извора, но наведува дека финансиските услови не биле откриени и дека Nvidia одбила коментар.
Tројцата ко-основачи на Kumo AI, Вања Јосифовски, Хема Рагаван и Јуре Лесковец, минатиот месец преминале во Nvidia. Истото издание наведува дека нивните LinkedIn профили веќе се ажурирани со позиции во Nvidia, додека веб-страницата на Kumo во моментот на објавата немала официјална белешка за промената.
Што е Kumo.ai?
Kumo AI не е уште еден chatbot стартап. Компанијата развива основни модели за предвидувања врз структурирани, релациски бизнис податоци, односно податоци кои компаниите веќе ги имаат во своите бази, data warehouse системи и табели. На својата веб-страница Kumo го објаснува проблемот преку типични бизнис прашања: дали трансакцијата е измама, дали клиент ќе замине, кој оглас треба да се прикаже, каква ќе биде побарувачката следниот квартал.
Поедноставено, Kumo се обидува да го направи предиктивниот AI достапен без класичниот долг процес на feature engineering, custom модели и посебни ML pipeline-и за секое прашање. KumoRFM е foundation модел за релациски податоци кој може да работи директно врз податоците во warehouse системите и да одговара на предиктивни прашања во природен јазик или преку SQL-like синтакса.
Ова е важен потег за Nvidia затоа што компанијата веќе не е само производител на GPU хардвер. Со преземања како ова, Nvidia се движи подлабоко во enterprise AI софтверот, каде што вредноста не е само во пресметковната моќ, туку и во моделите, податоците и алатките кои компаниите можат да ги користат врз сопствените системи. Digital Today, повикувајќи се на The Information, пишува дека Kumo би можел да го прошири портфолиото на AI модели оптимизирани за Nvidia хардвер и да им даде на компаниите основа за понатамошно прилагодување.
Кратка историја на Kumo AI
Kumo излезе од stealth во април 2022 година со 18,5 милиони долари Series A инвестиција предводена од Sequoia Capital. Во септември истата година, компанијата објави уште 18 милиони долари Series B рунда, исто така предводена од Sequoia, со учество на A Capital, SV Angel и повеќе ангел-инвеститори. Со тоа вкупно собраните средства достигнаа околу 37 милиони US долари.
Во 2024 година Kumo беше вклучен во Forbes AI 50 листата, а во 2026 компанијата го претстави KumoRFM-2, модел за релациски податоци кој, според објавата на компанијата, постигнува резултати врз 41 предиктивна задача и може да скалира до над 500 милијарди редови податоци. Kumo наведува дека моделот работи без task-specific training и без класично feature engineering.
Вања Јосифовски: од Скопје до Nvidia
Вања Јосифовски е еден од најуспешните македонски технолошки професионалци во Силициумската долина. Во интервјуто за IT.mk од 2008 година, Јосифовски беше претставен како истражувач во Yahoo! во областите на рекламирање, пребарување, бази на податоци и информациско пребарување. Тој е роден во Скопје, учел во Корчагин и во Шелби, Северна Каролина, потоа студирал во Љубљана, а магистрирал на Универзитетот во Флорида и докторирал на Универзитетот Линкопинг во Шведска.
Пред Yahoo!, Јосифовски работел во IBM Almaden Research Center, каде што бил дел од DB2 Native XML тимот и работел на enterprise search, XML документи и бази на податоци. Подоцна неговата кариера продолжува во Google, Pinterest и Airbnb. Пред Kumo тој беше CTO во Airbnb, а претходно CTO и VP Engineering во Pinterest, каде бил одговорен за техничката визија, инженерските тимови и развојот на талент.
Јосифовски има и претприемачка историја пред Kumo. Тој го ко-основал Kosei, стартап кој подоцна бил купен од Pinterest. Тој има и над 100 публикации во врвни технички конференции, 30 патенти и статус ACM Distinguished Scientist.
Ко-основачите: Хема Рагаван и Јуре Лесковец
Хема Рагаван е ко-основач и Head of Engineering на Kumo. Пред Kumo работела повеќе од една деценија на AI иницијативи во LinkedIn, каде што помогнала во системи како People You May Know и во период кога LinkedIn растел од 400 на 700 милиони корисници. Претходно работела и во Yahoo Labs и IBM T.J. Watson, со фокус на search, advertising, question answering и recommendation системи.
Јуре Лесковец е професор по компјутерски науки на Stanford, поврзан со Stanford AI Lab, Machine Learning Group и Center for Research on Foundation Models. Претходно бил Chief Scientist во Pinterest и investigator во Chan Zuckerberg Biohub. Stanford наведува дека Лесковец е меѓу пионерите во Graph Neural Networks и ко-автор на PyG, една од најкористените библиотеки за graph neural networks.
Тројката има јасна логика како основачки тим: Јосифовски носи искуство во скалирање AI и data системи во големи потрошувачки платформи, Рагаван носи engineering и applied AI искуство од LinkedIn, а Лесковец носи длабока истражувачка основа од Stanford и Pinterest. Официјалната страница на Kumo ги претставува токму преку тие улоги: Јосифовски како поранешен CTO на Airbnb и Pinterest, Лесковец како Stanford професор и ко-креатор на RDL и GNN, а Рагаван како поранешен Senior Director of Engineering во LinkedIn.
Аквизицијата е значајна од две причини. Прво, покажува дека Nvidia сака да контролира повеќе од AI stack-от: не само GPU и инфраструктура, туку и enterprise модели кои директно решаваат бизнис проблеми. Второ, Kumo е пример дека голем дел од следната AI вредност нема да доаѓа само од текст, слики и chat интерфејси, туку и од структурирани податоци, односно од табелите, трансакциите, customer records и логовите кои компаниите ги собираат со години.
За македонската технолошка сцена, ова е уште еден редок пример на глобален deep tech успех со македонски основач во центарот. Вања Јосифовски помина пат од Скопје, IBM и Yahoo Research, преку Pinterest и Airbnb, до стартап кој за неколку години стигна до аквизиција од Nvidia. Финансиските детали допрва може да бидат официјално потврдени, но ако бројката од The Information е точна, Kumo AI е една од најголемите познати tech приказни поврзани со македонски основач.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
Браво мајсторе!